Внимание!
Эта страница из архивного сайта. Информация может быть не актуальной.
Адрес нового сайта -
http://batyr.cap.ru/
Пуян Туçа ен хăйĕн талантлă ывăл-хĕрĕпе. Кунта вырнаçнă ялсем чăваш халăхне сахал мар çыравçăсем, юрă-кĕвĕпе сăвă-ăстисем, çутавçăсемпе вĕрентỹçĕсем парнеленĕ. Вĕсен шутĕнче хăйĕн сăпайлăхĕпе, хитрелĕхĕпе илĕртекен çамрăк поэт, журналист, писатель Марина Федоровна Карягина та пур. Тележурналистра ĕçленĕ май унăн сассине чăваш телевиденинче яланах илтме пулать.
Халиччен сăвă кĕнекисем кăна кăларнăччĕ вăл. Ака уйăхĕн 20-мĕшĕнче вара район халăхĕ патне хăйĕн прозăлла çырнă пĕрремĕш кĕнекине çитерчĕ.
Пурнăçра ача çуралсан ăна тĕне кĕртеççĕ, ят хураççĕ, кĕнекене те кун çути курсанах ăна пахаласа, хак парса халăх патне çитереççĕ. Шăп çак ĕçе тума пухăнчĕ те ял халăхĕ Кивĕахпỹрт клубне. Тĕрлĕ çулхисем пухăнчĕç мероприятине. Шупашкартан килнĕ сăвăçасем Раиса Сарпипе Альбина Юрату, чăваш эстрада юрăçисем Олег Кăйкăрпа Августа Уляндина автор çырнă сăвăсенчен юрăсем шăрантарса мероприятине илем кĕртрĕç.
М.Карягинан "Хура тумлă арçын" ятпа тухнă кĕнекине хакласа район пуçлăхĕн пĕрремĕш çумĕ Рудольф Васильевич Селиванов район Хисеп хучĕпе саламларĕ. Малашнехи ĕçре пысăк çитĕнỹсем сунчĕ. Тĕп библиотекăн директор çумĕ Нина Васильевна Мазякова куракансене кĕнекепе тĕплĕн паллаштарса тишкерỹ турĕ. Марина Карягина ытти çыравçĕсенчен хăйне евĕрлĕ чĕлxепе, курăмпа уйрăлса тăнине, чăваш чĕлхинче çĕнĕлĕх йĕр кĕртнине палăртрĕ, çыравçа саламласа парнепе чысларĕ.
Мероприятин чи техемлĕ саманчĕ вара Марина Карягина вунă çул каялла ỹкернĕ "Пĕчĕк шăпăрлансем" кинона тепĕр хут курса киленни пулчĕ. Унта вылякан геройсене сцена çине чĕнсе кăларсах саламларĕç. Вĕсем халь 3-4 çулхи шăпăрлансем мар ĕнтĕ, çитĕнсе çитнĕ каччăпа хĕрсем.
Кивĕахпỹртсем хăйсен ентешне - Марина Карягинăна çакăн пек маттур пулнишĕн, ял халăхне манманнишĕн, уяв парнеленĕшĕн тав туса тăвăллăн алă çупрĕç.