2017.12.26 Ентешĕмĕре Василий Давыдов-Анатри çуралнăранпа 100 çитнине халалласа

Чăваш халăх писателĕ, пирĕн ентеш Василий Давыдов-Анатри çуралнăранпа 100 çитнине чыслăн паллă турĕç Пăлапуç Пашьел вăтам шкулĕнче.

Эрне пуçламăшĕнчи линейкăранах пуçланчĕ уяв. Тăван чĕлхепе лтература вĕрентекен Светлана Никитина поэт-юрăç кун-çулĕпе кĕскен паллаштарчĕ, «Манăн чунăм таса» сăввине вуларĕ.

5-мĕш класра вĕренекен Сапожников Александр вара В.И.Давыдов – Анатрин «Упра тăван чĕлхемĕре» сăввине янраттарчĕ. Тăван чĕлхепе литература кабинетĕнче ăна халалланă кĕтес йĕркеленĕ.

7-8 класс ачисем поэзи сехетĕнче тĕл пулчĕç. Малтанах 7 класри Матвеева Екатерина В.И. Давыдов- Анатри пурнăçĕпе пултарулăхĕн паллăрах саманчĕсемпе, хайлавĕсемпе паллаштарчĕ. Гордеев Гордей «Атте-анне çумне ларсассăн» сăввине вуларĕ. Матюшкина София шăрантарнă «Аслă Атăл çинче пурăнатпăр» сăвва итлеме те кăмăллă пулчĕ. Шайманов Александр поэтăн  «Чăваш тĕрри» сăввине каланă май Светлана Никитина вĕрентекен ачасен умне чăваш тĕррисене хучĕ. Чăннипех те çак илеме ĕнетерÿллĕ сăнланине туйса илчĕç итлекенсем. Ытти нумай хайлавĕсене те аса илчĕç. Пĕр хайлавĕнче поэт:«Эп ĕçлерĕм çанна тавăрса…», - тесе çырать. Чăннипех те çапла. Ун сăввисемпе çырнă туслăх, тăванлăх, ĕç юррисем халăхра анлă сарăлнă. «Чеменпе Мерчен» поэмине вулама та кăсăклă. Прозăпа çырнă «Сатин кĕпе», «Эпир пĕр тăвансем», «Маттур Санюк» кĕнекесене те юратса вулаççĕ ачасем, пирĕн тăрăхра пултаруллă çынсем пурришĕн мăнаçланаççĕ те.