2017.11.01 Первомайскинчи вăтам шкулта семинар иртрĕ

 2017 çулхи чÿк уйăхĕн 1-мĕшĕнче Первомайскинчи вăтам шкула «Паянхи шкул вĕрентĕвĕнче чăваш чĕлхипе литератури урокĕсенче çĕнĕ ăслайсемпе тухăçлă усă курасси» темăпа районти чăваш чĕлхипе литературине вĕрентекенсем семинара пухăнчĕç.

Килнĕ хăнасене шкулти «Çăлкуç» фольклор ушкăнĕн хастарĕсем (ертÿçи- Елена Федоровна Сорокина вĕрентекен) юрă-сăвăпа чыслăн кĕтсе илчĕç.

Унтан итлеме килнисем уçă уроксене саланчĕç. Селиванова Алевтина Ивановна Трубина Мархви çырнă «Хăнаран» хайлавĕ тăрăх çиччĕмĕшсемпе вернисаж урок кăтартрĕ.  Сорокина Елена Федоровна ертсе пынипе 8-мĕш класра вĕренекенсем К.В.Ивановăн «Нарспи» поэминчи сăнарсене тишкерчĕç, паянхи пурнăçпа çыхăнтарса пĕтĕмлетÿсем турĕç. Уçă уроксенче пулнă вĕрентекенсем уроксене тивĕçлипе хакларĕç, кирлĕ сĕнÿсем пачĕç, паянхи шкулта усă куракан тухăçлă технологисемпе вĕрентÿ ĕçне йĕркелессине уçăмлатрĕç.

Паянхи шкул вĕрентĕвĕнче чăваш чĕлхипе литератури урокĕсенче тухăçлă технологисемпе усă курмалли çинчен вĕрентÿ пайĕн методисчĕ Елена Перепелкина тухса калаçрĕ, уçă уроксене кирлĕ шайра, Федерацин патшалăх вĕренÿ стандарчĕпе килĕшÿллĕн йĕркелесе ирттернине палăртрĕ,  шкул администрацине мероприятие ирттерсе яма майсем туса панăшăн тав турĕ.

 Юлашкинчен шкул ачисем хăйсен пултарулăхĕпе савăнтарчĕç: «Нимене» чăваш йăли-йĕркине кăтартрĕç, сăвă каларĕç, юрларĕс, ташларĕç. Экологи çулталăкне халалласа хатĕрленĕ «Тăван тавралăха упрар!» инсценировкăна та хăнасем алă çупсах йышăнчĕç. Пĕтĕмĕшле илсен, мероприяти пуриншĕн те усăллă иртрĕ.