2017.04.28 Поэт йăмрисем ĕмĕр-ĕмĕр кашлĕç

     Çут çанталăка, тăван тавралăха уйрăмах хавхаланса сăнлакан чăваш çыравçисем сахал мар. Вĕсенчен пĕри – Алексей Александрович Воробьев поэт. Кăçал вăл çуралнăранпа 95 çул çитет.

           Пăлапуç Пашьел вăтам шкулĕнчи  11 класс ачисемпе Светлана Никитина вĕрентекен вара юбиляр пурнăçĕпе ĕçĕ-хĕлĕ тăрăх Раççейри Экологи çулталăкне халалласа пултарулăх  урокĕ ирттерчĕ.

Колхозра тĕрлĕ ĕç пурнăçланă, çавăн пекех агрономра вăй хунă çыравçă кун-çулĕ чăннипех те çут çанталăкпа тачă çыхăннă. Ахальтен-им  сăввисене вуласан тăван çĕр сĕткенĕ ÿте сăрхăннине е тутлă кулачă шăрши сăмсана кăтăкланине, тăван тавралăх илемĕ чуна ăшăтнине туятăн. Ачасем поэт пултарулăхĕ çинчен тĕрлĕ литература вуланă, çакна панă тест ыйтăвĕсем çине тĕрĕс хуравлани те çирĕплетрĕ. «Çăкăр» тата «Пучах» ушкăнсем Алексей Воробьевăн «Йăмра», «Кипенек» хайлавĕсенче сăнланнă йăмра, юман йывăçсен пĕлтерĕшĕсене уçса пачĕç, хут çине те ÿкерчĕç, вĕсем чăвашсен пурнăçĕнче мĕнле вырăн йышăннине те палăртрĕç. «Алексей Воробьев хăй ĕмĕрĕнче нумай йăмра лартнă. Пурнăçра та, поэзире те поэт йăмрисем ĕмĕр-ĕмĕр кашлĕç», - тенĕ ун пирки чăваш халăх поэчĕ Юрий Сементер. «Пуç пĕтсен те çĕр çинче эп йăмра пулса кашлам» - тенĕ поэт хăй те. Ытти нумай самантсем те ачасен асĕнче юлĕç. «Папка çурать,  йывăç хаш сывлать – йывăр пулĕ çав…Çуралать илем. Ман та илем çуратасчĕ сăмахăмпа»,- тесе каланă поэт сăмахĕсем епле паха!

Кашни çын поэт пулаймĕ, паллах, анчах тавралăха тĕрлĕ ĕçпе илем кÿме пурте пултараççĕ. Пурнăç çулĕ çине тухма хатĕрленекен яшсемпе хĕрсем валли А.Воробьевăн çутă сăнарĕ пĕлтерĕшлĕ пуласса шанас килет.