2017.04.24 Яланах янра, чăваш чĕлхи!

Чäваш чĕлхи – халăхӑн ĕмĕр сӳнми ăс-тӑн чечекĕ.  Мĕн тери ҫепĕҫ те илемлĕ чăваш чĕлхи! Вăл ылтӑн-кĕмĕлтен те хаклăрах, хĕвелпе танах хĕрӳ те хӳхĕм. Кашни сӑмахĕ чуна пырса тивет. 

 Патăрьелĕнчи пĕтĕмĕшле пĕлӳ паракан 1-мĕш вăтам шкулта иртекен чăваш чëлхи эрнине 3а класра вĕренекенсем те хастар хутшăнчĕҫ. Чăваш чĕлхи урокĕсенче ачасем Иван Яковлевич Яковлев халалĕсене тĕпчерĕҫ, хамăр ентешсен Раиса Сарпи, Николай Кушманов, Ева Лисина, Марина Карягина кӗнекисемпе паллашрӗҫ, унтан ӳкерчĕксем турĕҫ. Настя Сулагаева, Алеша Елкин, Настя Емельянова, Софья Гранатская ӳкерчĕкӗсем питӗ илемлӗ тухрӗҫ. Чăваш республикин символӗсен авторӗсемпе паллашни виҫҫӗмӗш класс ачисене чăваш чӗлхине тата юратса вӗренме,  ăна упрама, тӗпчеме, тавра курăма ӳстерме хавхалантарчӗ.

Тăван чӗлхе—тăван халăхăн нихăҫан та иксӗлми ăс-тăн ҫăл куҫӗ. Ҫак ҫăл куҫран эпир мӗн ачаран тумламăн-тумламăн пӗлӳ илсе ӳсетпӗр. Тăван сасăран, тӑван чӗлхерен пирӗн ăс-хакăл, чун-чӗре вăй-халӗ, кăмăл никӗсӗ аталанма пуҫланине манас марччӗ. Чăвашсен аслăҫутта кăлараканӗ И.Я. Яковлев ҫапла палăртнă: «Анне чӗлхи – халăх ӑс-хакăлӗпе кăмăл-сипечӗн аслăран та аслă вăйӗ, унăн тӗп тӗрекӗ».