2017.03.27 Сывлăхран хакли çук

      Чăваш литературинче те сывлăхшăн тăрăшма вĕрентекен хайлавсем сахал мар. Пăлапуç Пашьел вăтам шкулĕн 6-мĕш класра вĕренекенĕсем Иван Лисаев çыравçăн «Чире парăнма çуралман» повеçне юратса вулаççĕ.  Хайлаври тĕп сăнар – хăйĕн чирĕпе ниме парăнмасăр кĕрешекен Витя Кулешов.

     Хальхинче те улттăмĕшсем  повеçе тишкернĕ май Витя Кулешов сăнарĕ вĕсене пурнăçа юратма, чирлесен шанчăка çухатмасăр унпа кĕрешме, сывлăха чи хаклă пурлăх вырăнне хурса упрама хавхалантарни çинчен каларĕç. Витя йывăр чирне – шăмă туберкулезне – çĕнтерни тухтăрсен, ашшĕ-амăшĕн, вĕрентекенсен, тус-юлташĕсен ĕçĕ, пулăшăвĕ çеç мар-çке. Ача хăйне шелленине те юратман, йĕпе-сапа çанталăкра та çуран утнă, спорт секцине çÿреме те мехел, вăй çитернĕ, шăла çыртса хусканусем тунă, тухтăр хушнисене те пурнăçланă. Сывлăхран хакли çуккине аван ăнланнă çамрăк ача. Ку паттăрлăх мар-и вара? Вĕренекенсене ура çине çирĕп тăма тăрăшакан Витя чăннипех те тĕлентерчĕ. Кашниех хăйĕн шухăшне калама тăрăшрĕ урокра. Хайлава та автор çапла вĕçленĕ: «Хăй çине тăнипе çын пулчĕ, чăтăмлăхĕ, тÿсĕмлĕхĕ пысăккипе чире çĕнтерчĕ, шăпа пÿрнĕ – иртме çук тесе пăхса тăмарĕ…» - çапла калаçрĕç ун çинчен тăван ялта». Сывлăх çинчен калакан ваттисен сăмахĕсене те аса илчĕç ачасем. Юлашкинчен çапла пĕтĕмлетрĕç: «Сывлăх – чи хаклă пурлăх, ăна ачаран упрамалла, сиенлĕ йăласемпе туслашмалла мар, спорта юратмалла, уçă сывлашпа туслашмалла…»