2017.03.21 Поэзи кунне халалласа

Поэзи варкăшĕ паянхи кун Пăлапуç Пашьел вăтам шкулĕнче  чăваш чĕлхипе  литературин  кашни урокĕнчех сисĕнсе тăчĕ. Светлана Никитина вĕрентекен  9-мĕш класра «Пăхăнуллă хутлă предложенисем» темăпа зач́ет урокĕ ирттернĕ май тĕслĕхсем тупма  ачасене Патăрьел районĕнчи поэтсен кĕнекисене валеçсе пачĕ. Урокра уйрăмах Сергей Кондратьев, Ольга Гордеева, Елена Михайлова хастар пулчĕç. Геннадий Айхи, Николай Исмуков, Давыдов-Анатри тата ытти поэтсен сăввисене тишкерчĕс ачасем, хăйсене килĕшнĕ йĕркесене вуласа пачĕç.

5 класра вĕренекенсем вара килте В.Эктелĕн «Çулçăсем» сăввине чăвашларан вырăсла куçарса килнĕ, пĕрин хыççăн тепри илемлĕ вуласа катартрĕç. Уйрăмах Ксения Степановăпа Валерия Максимова, Александр Аблясов ăнăçлă куçарнă. Çавăн пекех хамăр районти поэтсене тепĕр хут аса илсе тухрĕç. Раиса Сарпи, Лидия Ковалюк, Марина Карягина, Митта Ваçлейĕ хайланă сăвă йĕркисене тетраде çырса  илчĕç, илемлĕ вуласа кăтартрĕç.

Петĕр Хусанкай калашле,  «поэзи – шырав, кĕрешÿ, ăмăрту, ача йăл кулли, гени тарĕ…» пулнине 6 класра вĕренекенсем çирĕплетсе пачĕç. «Наречисем» темăна пĕтĕмлетнĕ май урокра поэзи валли те вăхăт уйăрчĕç. Наречисемпе усă курса ашшĕ-амăшĕсене халалланă сăвă йĕркисем шăрçаларĕç. Мĕн чухлĕ ырă сăмах,  хăйсене кун кăтартнă çынсене хаклани, юратни, тав туни сисĕнчĕ çав йĕркесенче. София Матюшкина, Ольга Вазенкова Александр Шайманов, Никита Васильев, Наталия Сакмарова, Екатерина Матвеева, Гордей Гордеев, Димитрий Разинов, Максим Чебоксаров сăввисене итлеме питĕ кăмăллă пулчĕ. Поэзи кунне халалланă мероприятисем вара уроксем хыççăн та тăсăлчĕç. Ахальтен-и пирĕн шкул ачисем поэзипе çыхăннă  район, республика шайĕнчи конкурссене хастар хутшăнса малти вырăнсене йышăнаççĕ. Вĕсем вара Митта Ваçлейĕн поэзи ырсемĕ çнчен каланă виçĕ хăватне яланах асра тытаççĕ.