2016.12.26 Ĕçне кура хисепĕ

            Чăваш Енри ĕç çыннин çулталăкĕ вĕçленсе пырать ĕнтĕ. Çавна май Пăлапуç Пашьел шкулĕнчи вăтам класс ачисем хушшинче «Ĕçне кура хисепĕ» темăпа сочиненисен конкурсĕ иртрĕ.

Тăван чĕлхе илемне туйса çемьери чи çывăх çынсем çинчен шăрçаланă вĕсенчен чылайăшĕ  хăйсен хайлавĕсене. Юратнă ашшĕ-амăшĕ, аслашшĕ-асламăшĕ, кукашшĕ-кукамăшĕ çав тери ĕçчен пулни савăнтарать ачасене. Вĕсенчен тĕслĕх илсе ÿсеççĕ-çке шăпăрлансем. Сочиненисене ачасем пичетлесе сăн ÿкерчĕксемпе те илемлетнĕ, пуянлатнă. Светлана Матюшкина аслашшĕне, Матюшкин Василий Герасимовича,  хисеплени куçкĕретех. Вăл хăй вăхăтĕнче тракторист та пулнă, сарă тинĕсре карап та çĕретнĕ, бригадир ĕçĕнче те хисеп çĕнсе илнĕ. Кил таврашĕнче те ун валли ĕç тупăнсах тăрать. Ирина Христофорова та аслшшĕн кун-çулĕпе паллаштарать. Алексей Алексеевич Христофоров вара хăйне тĕрлĕ ĕçре тĕрĕсленĕ. Хăйне щанса панă кирек мĕнле ĕçре те хиепе тивĕçнĕ. Шкул завхозĕнче те, уй-хирте те тăрăшнă вăл.

            Стешăпа Степа Степановсем вара хăйсемпе пĕрле пурăнакан асламăшĕ çинчен çырса панă. Лидия Павловна хисеплă канăва кайиччен Тула хулинче чугун çул тунă çĕрте ĕçленине те, ял ферминче доярка пулнине те палăртнă вĕсем. Халĕ те ахаль ларма юратмасть иккен Лидия Павловна, выльăх-чĕрлĕх пăхать, пахчара тăрмашать, юратнă мăнукĕсене те ĕçе хăнăхтарать.

            Реймова Анна та хăйĕн асламăшĕпе мухтанать. Тăхăр ачаллă çемьере ÿснĕ Реймова Вера Герасимовна пурнăçĕ пĕрре те çăмăл килмен. Пиччĕшĕ вăрçран таврăнайманни те, выçă вилес мар тесе хирте çĕр улми крахмалĕ пуçтарни те, тăхăнмалли çукран урана çăпата сырни те асламăшĕн асĕнчен тухас çук. Шкула та инçете çÿренĕ, вăрман витĕр тухмалла пулнă,  темле йывăрлăх  та тÿснĕ, хуçăлса ÿкмен. Медучилище пĕтернĕ хыççăн Вера Герасимовна нумай çул хушши Аслă Арапуç больницинце вăй хунă. Халĕ унăн 8 мăнукпа 3 кĕçĕн мăнукĕ пур, вĕсем те ĕçчен пулнине курасшăн хисеплĕ ватă.

           Алексей Бахитов   вара хăйĕн сочиненийĕнче тăхăр теçетке пуçтарнă Мешков Василий Осипович ĕçпе вăрçă ветеранĕ çинчен туллин çырса панă. Вăрçă хыççăн Ваççа пичче уй-хир бригадирĕ те пулнă, трактор та çÿретнĕ, конюх ĕçне те тиркемен, кăмака та тунă. Мăшăрĕпе, Улькка аппапа, тăхăр ача çитĕнтернĕ. Ачисене те хăйсем пекех ĕçе юратма, хисеплеме вĕрентнĕ.

           Алексей Андреев Пăлапуç Пашьелĕнче пурăнакан  Ларев Петр Николаевич предприниматель çинчен шăрçаланă хăйĕн хайлавне. Вăл ял тăрăхĕн депутачĕ те. Малтанхи  вăхăтра арман тытнă, йĕри-таврари  ял çыннисем  çăнăх авăртма кунта килнĕ пулнă. Халĕ Ларевсен çемйи пластикран чÿречесем тăвас бизнеса аталантарать. Мăшăрĕпе, Елена Леонтьевнăпа, тăватă ача ÿстереççĕ. Ачисем те пĕринчен тепри маттур. Вĕренÿре çеç мар, юрă-ташăра та ăста. Пур çĕре те ĕлкĕрме тăрăшать П.Н.Ларев. Шкула та спонсор пулăшăвĕ кÿрет. «Петр Николаевич ĕçĕпе те, ăсĕпе те курăмлă çын. Манăн та унран тĕслĕх илес килет. Ятлă çынна ял савать-çке», - тесе вĕçленĕ хăйĕн ĕçне Алексей.

            Александр Чернов, Сергей Никитин, Оксана Алексеева амăшĕсен ĕçĕ-хĕлĕпе  паллаштараççĕ, Анастасия Соколова тараватлă та ĕсчен кукамăшĕн кун-çулне йĕрленĕ, Анжела Шаймановăн, Снежана Семеновăн  ашшĕсем çав тери пултаруллă пулнине те пĕлтĕмĕр.Алена Выросова вара кÿршĕри Палюк пиччĕшне сăнласа панă, Семен Спринсянăн ĕç темипе ваттисен сăмахне тĕпе хурса çырнă сочиненийĕ те пуян чĕлхеллĕ.

           Сочинени хайлакансем те яланах маттур пуласса шанас килет. Малти вырăнсене Светлана Матюшкина, Степанпа Степанида Степановсем, Алексей Бахитов, Анна Реймова, Алексей Андреев çĕнсе илчĕç.