2016.04.22 Чăваш чĕлхи эрни пуçланчĕ

     Кашни çулах, ака уйăхĕн 25- мĕшĕнче, Чăваш чĕлхи кунне уявлатпăр. Çак уяв вăл чăвашсене çутта кăларнă Иван Яковлевич Яковлев çуралнă кунĕпе çыхăннă. Патăрьелĕнчи пĕтĕмĕшле вăтам пĕлÿ паракан шкулта та чăваш чĕлхине сума суса ирттерекен ĕç- хĕл пуçланчĕ. Чи малтанах 8 –мĕш классем хăйсен пĕлĕвне, тавракурăмне "Мĕн? Ăçта? Хăçан?" брейн - ринг вăйăра тĕрĕслерĕç. Вăйăра ачасен çирĕп ăс - тăнĕ палăрчĕ. Анчах та ăслинчен ăслăраххи пур тени тÿрре тухрĕ. Пĕрремĕш вырăна Богданов Игорь, Фролова Елена тухрĕç. Иккĕмĕшпе виççĕмĕш вырăнсене вара Иванов Николайпа Попов Даниил   пайларĕç.

   Çиччĕмĕш классем вара И. Я. Яковлев ачалăхĕпе паллашрĕç. Кунта çамрăк Иван Пăрăнтăк шкулĕнче вĕреннĕ самантсене аса илчĕç. Вĕренекенсене И.Я. Яковлев вĕреннĕ çын пулма ĕмĕтленни, унăн ырă кăмăлĕ, сăпайлăхĕ, шухăшĕ кăсăклантарчĕ. Пурте кăмăллă юлчĕç.