2015.06.18 Сакăт шкулĕ çумĕнчи лагерьти конкурс

Июнь уйăхĕн 16-мĕшĕнче Патăрьел районĕнчи Сакăт шкулĕ çумĕнчи лагерьте конкурс иртрĕ.

Ачасем ирхи апат хыççăн пурте пĕрле пуçтарăнса тăван тавралăха сăнас-тĕпчес тĕллевпе экскурсире пулчĕç.

Шихирданка, Марака шывĕсем хĕррипе ÿсекен тĕрлĕ ÿсен-тăрана тупса, чăвашла-вырăсла ятне шырарĕç. Вожатăйсем пулăшнипе ку е вăл курăк пирĕн кулленхи пурнăçра мĕнле пĕлтерĕшлĕ пулнине те пĕлме тăрăшрĕç. Паллах, çакна тума кĕçĕн çулхи ачасене аслисем те — воспитательсем пулăшрĕç.

Пĕлмелли-тĕпчемелли, ас туса юлмалли нумай пулчĕ ачасен. Экскурси хыççăн лагере таврăнсан конкурс та иртрĕ. Хăйсем пухнă хирти-çаранти çум курăксенчен чечек çыххисем ăсталарĕç отрядсем. Тăватă букет капăрланса та мăнаçланса ларчĕç  конкурссен тĕпелĕнче. Чи-чи капăр букет "Дары лета" ятлă «Ромашки» отрядăн пулчĕ. Чи пуян букета «Цветик –семицветик»   çĕнсе илчĕ. Ăна «Волна» отряд ăсталанă. Чи интереслĕ букет «Дружба» отряд хатĕрлеме пултарчĕ. Чи кĕçĕннисем вара «Чи тутлă шăршлă» букет ăсталама пултарчĕç.