2015.04.20 Никам та манман, нимĕн те манăçман

Чăваш çыравçисем вăрçă çинчен сахал мар хайлав çырнă. Вĕсене вуласан чун-чĕререн пăлханса каятăн, асап, çухату тÿснĕ сăнарсемпе пĕрле хурланатăн, кулянатăн, çав вăхăтрах йĕретĕн те. Çĕр-шыв ирĕкĕшĕн, этем телейĕшĕн пуçне хунă çынсем çинчен, вĕсен юнĕ ахаль ÿкменни, паянхи тăнăç пурнăçшăн халăхăн чаплă çынсене çухатма тивни çинчен калаççĕ пире сăвăсем, калавсем…

Халăхпа пĕрле çыравçăсем те тăшмана хирĕç пĕр çын пек пулса çапăçнă. Вĕсенчен пĕрисем вăрçă хирĕнче выртса юлнă, теприсем килĕсене сусăрланса е аманса таврăннă.

Çакăн пирки калаçрĕç те ĕнтĕ Кивё Ахпуртри 5 класра вĕренекенсем тăван литература урокĕнче «Тискер вăрçă ан пултăр нихăçан!» темăна вĕреннĕ май.

Николай Мартыновăн «Юнлă çырла» хайлавне вуласа тишкерчĕç, хамăр тăрăхри вăрçă ветеранĕсене аса илчĕç.