2015.03.24 Шкулти пысăк уяв

Пăлапуç Пашьелти вăтам шкулта Раççейри литература тата Чăваш енри К.В.Иванов çулталăкне халалласа пысăк уяв иртрĕ.

Малтанах пухăннисене шкул директорĕ Павлова Лиана Николаевна саламларĕ. Ачасене библиотекăпа туслă пулма, тĕрлĕ хаçат-журнал çырăнса илме сĕнчĕ. Литературăпа туслă çынсем анлă тавра курăмлă, пысăк чунлă пулнине асăнса хăварчĕ.

Уяв программи пуян пулчĕ. Ăна шкулти чăваш чĕлхипе литератури вĕрентекен Никитина Светлана Петровна ертсе пычĕ. Чи малтанах ачасем «Кам нумай вулать, çав нумай пĕлет» ятпа иртнĕ викторинăра тупăшрĕç. Чăваш, вырăс, тутар тата ытти халăх литературине лайăх пĕлнине кăтартса пачĕç. Чи нумай балл пухса 10-мĕш класра вĕренекен Любовь Мешкова çĕнтерÿçĕ пулса тăчĕ.

Викторина хыççăн сцена çинче 9 класри Даша Иванова «Год литературы» тата 5 класри Любовь Епифанова Г.Айхин «Константин Иванов» сăввисене янраттарчĕç.

6 класра вĕренекенсем Козлова Вера Ильинична вĕрентекен ертсе пынипе Петĕр Хусанкай халăх юмахне тĕпе хурса çырнă «Çĕр çинче мĕн вăйлă?» хайлав тăрăх инсценировка лартса пачĕç. Патша рольне Сергей Мешков ăста калăпларĕ.Çавăн пекех Ирина Мазякова, Ксения Чернова, Матвей Пестерев, Павел Соболев, Ксения Кадикова, Виктория Аблясова, Александра Шавикова, Илья Киданов, Лидия Храмова, Геннадий Ларев çамрăк артистсем те чунтан савăнтарчĕç.

Уявăн тепĕр пайĕнче чăвашла тата вырăсла сăвăласа е прозăпа çырнă хайлавсене пăхмасăр вулакансен конкурсĕ иртрĕ. 50 ытла ача хутшăнма кăмăл турĕ унта. Чăвашла К.Иванов, Г.Айхи, Митта Ваçлейĕ, С.Шавли, Ю.Сементер, И.Тукташ, П.Хусанкай, М. Карягина, А.Артемьев тата ытти нумай авторсен хайлавĕсене пĕри тепринчен ăстарах калама тăрашрĕ. Вырăслисем хушшинче Н.Некрасов, А.Пушкин, И.Крылов, Н.Носов, К.Симонов, М.Исаковский, Ф.Тютчев тата ытти нумай çыравçăсен хайлавĕсене суйласа илнĕ ачасем. Мĕн чухлĕ кăмăл-туйăм, çĕкленÿлĕх, хастарлăх тапса тăчĕ вĕсен чĕрисенче, мĕн чухлĕ хĕлхем çиçрĕ куçĕсенче!

Конкурсра вара çĕнтерÿçĕсене палăртмаллах. 1-4 классем хушшинче чăвашла сăвă каласа София Матюшкина ( 4класс, 1-мĕш вырăн), Анастасия Матвеева (1 класс, 2-мĕш вырăн), Анастасия Бахитова, Лариса Урмакова (1 класс, 3-мĕш вырăн) палăрчĕç. Вырăсла калакансенчен çак çулхисем хушшинче 4 класри Екатерина Матвеевăна çитекенни пулмарĕ. 2-3-мĕш вырăнсене те çак класри Максим Чебоксаровпа Роман Павлов пайларĕç.

5-8 классем хушшинчи хĕрÿ ăмăртура 5 класри Анастасия Соколова К.Ивановăн «Икĕ хĕр» юмахне вуласа малти вырăна çĕнсе илчĕ. Çак класри 2-мĕш вырăна тухнă Спринсян Семен Стихван Шавлин «Вĕçкĕн Ваççа» юптарăвĕпе тытканларĕ. Г.Айхи сăввисене вулакан 5 класри Светлана Матюшкинăпа 7 класри Елена Михайлова та, М.Карягина сăввипе паллаштарнă Ольга Гордеева та, К.Ивановăн «Нарспи» сыпăкне вуланă 8 класри Александр Кондратьев та маттур пулчĕс. Тÿресем пурне те 3-мĕш вырана тухнине пĕлтерчĕç.

Çак ÿсĕмре вырăсла чи лайăх калакансем 6 класри Ксения Черновăпа 5 класри Анна Реймова пулчĕç. 7 класри Ольга Гордеева , 6 класри Виктория Аблясова, 5 класри Ирина Христофоровăпа Анжела Шайманова тата 8 класри Петр Гурьев 3-мĕш вырăна тухрĕç.

Куракансене 5 класри Семен Спринсянпа Светлана Матюшкина Петĕр Ялкирĕн «Шăшисем» интермедине выляса пачĕç. Библиотекăсенче ик ураллă «шăшисем» пулмалла маррине, кĕнекесене яланах тирпейлĕ тытмаллина асăрхаттарчĕç вĕсем.

Аслă классем те хастар хутшăнчĕç конкурса. 10 класри Кристина Кондратьева Митта Ваçлейĕн «Чул çыран хĕрринче» сăввине каланă чух залра шыв сыпнă пек ларчĕç. Çак класри Люба Мешкова та Г.Айхин «Пÿртĕм…» сăввине чуна тивмелле каларĕ. 9 класри Дария Иванова И.Тукташăн «Шурă-шурă кăвакарчăн» сăввипе 3-мĕш вырăна тухрĕ.

Вырăсла вулакансем хушшинче 9 класри Елена Тихонова, Виолетта Катырева, Дария Иванова паларчĕç.

10 класри Люба Мешкова тата Николай Александров Çеçпĕл Мишши Анастасия Червякова патне янă çырусене вуласа савантарчĕç.

11 класра вĕренкенсем çĕнтерÿçĕсекне илемлĕ юрăпа саламларĕç. Уяв усăллă иртрĕ. Çĕнтерÿçĕсене хисеп хучĕсемпе чысларĕç.