2014.04.16 Вăрман ĕçченĕпе тĕл пулу иртрĕ

 Ака уйăхĕн 15-мĕшĕнче Патăрьел районĕнчи Сăкăт шкулĕн актовăй залĕнче Шăмăршă лесничествин директорĕпе Владимир Иванович Глуховпа тĕл пулу иртрĕ. Тĕл пулăва Сăкăт шкулĕнчи 5-11 классенче вĕренекенсем, вĕрентекенсем  хутшăнчĕç.  

     Владимир Иванович Сăкăт шкулĕн выпускникĕ. Вăл тăван шкулне манмасть, килсех çÿрет, ачасемпе час-часах тĕл пулать, калаçусем те ирттерет. Ачасем вăл спонсор пулса  тăван шкулне чылай пулăшу панине те пĕлеççĕ.

     Вăрман хуçалăхĕн ĕçченĕ хăй суйласа илнĕ професси çинчен чылай каларĕ, вăрманçăсен ĕçĕ-хĕлĕпе тĕплĕн паллаштарчĕ,  малашлăхри ĕмĕчĕ-тĕллевĕ пирки те манмарĕ.  Этемпе çут çанталăк хушшинчи тачă çыхăну пирки, вăрманăн пирĕн пурнăçри пĕлтерĕшĕ çинчен тепĕр хут аса илтерсе хăварни те вырăнлă пулчĕ. Вăрман пире пулăшать пулсан, ăна та пиртен  пулăшу кирлĕ! Сăкăт ялĕпе юнашарах вăрман. Ял çыннисем (ачасем те çав шутрах) вăрмана каймасăр-килмесĕр тăмаççĕ, паллах . Камăн пĕр-пĕр ĕç тупăнать, кам сывлăхне çирĕплетме  шухăшлать. Часах çуллахи шăрăх кунсем те персе çитĕç. Çавна май пушар хăрушлăхĕ çинчен ас тутарса хăварни те кирлĕ. 

     Çамрăк ăрăва çак професси пирки тĕплĕнрех пĕлни те пăсăклă мар. Тен, паян çак залра ларакан ачан ыранах вăрманçă пулас ĕмĕт çуралĕ.  Шкултан вĕренсе тухса каякан каччăсемпе хĕрсем хисеплĕ хăнана вăрман хуçалăхĕпе çыхăннă профессисем  пирки ыйтусем те пачĕç. Владимир Иванович вĕсен  ыйтăвĕсене туллин хуравларĕ, вĕренÿре çитĕнÿсем сунчĕ.

     Сăкăт шкулĕн директорĕ А.В.Падусев  хăнана  вĕренкенсен ячĕпе тав сăмахĕ каларĕ, ĕçре çитĕнÿсем, ăнăçу сунчĕ.