2014.03.31 Йĕркене пăхăнмасан сывлăхсăр тăрса юлан!

Велосипедист, ан ман:

Çула тухрăн — асăрхан!

Йĕркене пăхăнмасан

Сывлăхсăр тăрса юлан,

Пурнăçна та çухатан!

     Çуркунне— çулталăкăн чи илĕртуллĕ вăхăчĕ. Ватти те, вĕтти те хĕвел ăшшине туртăнать, чĕрĕлекен, çĕнелекен çанталăкпа киленме уçă сывлăша ытларах та ытларах туртăнать. Ача-пăча уйрăмах хаваслă: кам велосипедпа, кам скутерпа-мопедпа (ашшĕ-амăшĕ панă правапа!) типнĕ-типмен çул çине тапса тухать, Çил ачипе ăмăртмах пуçлать! Çунат пулсан — вĕçсе хăпарма та хатĕр!

     Инкек-синкеке никам та кĕтмест, анчах лешĕ юнашарах çÿрет. Çул-йĕр правилисене пăхăнма юратман е пачах та пĕлмен çăмăлттайсене çиччас ярса илет. Сывлăхсăр, сусăр хăварать, е, тепĕр чухне, Пурнăçран та уйăрать. Пĕр сăмахпа каласан, тÿрлетейми инкек е хуйхă килсе тухать.

     Çапла ан пултăр тесе Патăрьел районĕнчи Сăкăт шкулĕнче класс ертÿçисем çуркуннехи каникула каяс умĕн ачасемпе ятарласа ку темăпа калаçусем ирттерчĕç, вĕренекенсене çул-йĕр правилисем çинчен тепĕр хут аса илтерчĕç. 

     Ашшĕ-амăшĕн те яваплăха ÿстересси пирки шухăшламалла, паллах. Велосипед е ытти техникăна илсе панипе çеç çырлахмалла мар, ывăла е хĕре  çул-йĕр правилисем çинчен ас тутарсах тăмалла.