2014.03.29 "Уксах-чăлахран кулма хушман,"—

     чăваш ятлă халăхăн çакăн пек ваттисен сăмахĕ пур. Пирĕн ваттисем çапла каланă пулсан, вăл çирĕп саккун пекех. Патăрьел районĕнчи Сăкăт шкулĕнче улттăмĕш класра вĕренекен хĕр ачасемпе арçын ачасем Людмила Сачкова çырнă "Оля-Улькка" калавпа паллашрĕç.

     Мĕн таран чуна çывăх произведени! Чăн-чăн пурнăçри пекех вĕт. Шкулта вĕреннĕ чух чип-чипер те маттур пулнă Оля хăрушă чире пула "ухмах Улькка" пулса тăрать. Чирĕнчен ытла урамри ачасем уксах-чăлахран çапла йĕкĕлтесе кулни мĕнле хăрушă!

Хайлава  Анюрова Е.В. вĕрентекенпе пĕрле вуласа тишкернĕ хыççăн улттăмĕшсем  çакна питĕ лайăх ăнланчĕç: " Çынна нихăçан та ухмах тесе ан кала. Чире никам та ыйтса илмест. Инкек куçа курăнса килмест. Оля вырăнĕнче кирек  кам та пулма пултарать."