2014.03.27 "Сывлăхлă пуласси хамăртан килет"

     Юрий Скворцов çыравçăн произведенийĕсем шкул ачисене питĕ килĕшеççĕ. Писатель хăйĕн ĕçĕсенче ытларах шăпа ыйтăвне хускатать, этемре нимрен малтан чун пахине курма ÿкĕтлет, çын чунне пусахлассинчен упранма хистет.   Чуна хускатмалла, ыраттармалла çырнă вăл "Уках хурăнĕ" повеçне те.  Уках ятлă хĕрĕн шăпипе  паллашнă хыççăн "Сывлăхлă пуласси хамăртан килет" текен шухăша тепĕр хут çирĕплетсе  хăварчĕç Патăрьел районĕнчи Сăкăт шкулĕн 11 класĕнче вĕренекен хĕрсемпе каччăсем. 

Чăнах та, вăрçă нушине пула мĕн чухлĕ çын вилет, тертленет, асапланать... Урăххи пирки тарăн шухăша кайрĕç кунта вĕренекенсем. Ку хайлаври тĕп сăнар фронта пулăшас, çĕнтерĕве хăвăртлатас тесе чунне пама хатĕр. Пурнăçа юратакан  вун çиччĕри чипер те маттур хĕр Уках, хăйĕн сывлăхне упрасси пирки пачах та шутламасть. Вилĕм ун патнелле çывхарнăçемĕн çывхарнине  вулакан та туять. Кăштах та шеллемест-çке Уках хăйне! Ятлас  килчĕ ачасен ăна çакăншăн: " Малалла та пурăнмалла вĕт санăн, савнине вăрçăран кĕтсе илмелле, çемье çавăрмалла — сывлăху вара хăрушлăхра!" Телей хамăр алăра тенĕ пекех, сывлăхлă пуласси хамăртан нумай килет.