2013.09.23 Наци кросĕ-2013 Сăкăтра

Наци кросĕ Патăрьел районĕнчи Сăкăт ялĕнче спорта юракансен уявĕ пулса тăчĕ. Кашни çулах пысăк хавхаланупа иртет вăл. Çак хаваслă уява хутшăнма чăн-чăн спортсменсене çанталăк сÿрĕклĕхĕ чăрмантараймасть. Акă, хальхинче те, çумарлă çанталака пахмасăр, старта çĕр ытла çын тăчĕ.

Чи малтанах физкультурăпа спорта юратакансене, сывă пурнăç йĕркине тытса пыракансене Сăкăт ял тăрăхĕн пуçлăхĕ Сергей Толстов уяв ячĕпе ăшшăн саламларĕ. Ун хыççăн Сăкăт шкулĕн ертÿçи Анатолий Падусев сăмах илчĕ. Сăкăт шкулĕн физкультура учителĕ Владислав Анюров  чи малтан ялти "Çăлкуç"ача сачĕн ĕçченĕсене, унта çÿрекен пĕчĕк шăпăрлансене старта тăратрĕ. Ун хыççăн Сăкăт шкулĕнче вĕренекенсем: малтан кĕçĕн классем, кайран вăтам тата аслă классем — тĕрлĕ дистанцисене пĕр -пĕринпе ăмăртса чупрĕç.

Спорт уявĕнче «Чи çамрăк спортсмен» ята ача садне çÿрекен А.Ёлкин çĕнсе илчĕ. А.Правитель, В. Шапкин, В.Кариков тата Л.Чернова, В.Чумакова, М.Анюрова кĕçĕн классенче вĕренекенсем те чи маттуррисем пулчĕç кросра. Кĕске çаврăма ачасем пурте хăвăрт чупса тухрĕç. Жюри никамăн кăмăлне те хăварас темерĕ – кашнинех мухтав хучĕпе чысларĕ.   Д.Хмелёв, А.Сандыркин, А.Кузнецов тата В.Чернова, А.Кузнецова, М.Анюрова вăтам классенче вĕренекенсем кросра чăн-чан маçтăрсем пулни палăрчĕ. Ăмăртусене хутшăнакансен çулĕсем ÿссе пынă май, дистанци те вăрăмланчĕ.  В.Лукьянов, Б.Юсупов, Ю.Тинюков тата Г.Прокопьева 8-9 классен спортсменĕсем старта чи малтан çитрĕç. Аслă классем хушшинче вара Е.Анюров, А.Анюров, А.Кушников шкул чемпионĕсем Çĕнтерÿçĕ дипломне илме тивĕçлĕ пулчĕç.

 Наци кросĕ-2013 Сăкăтра тивĕçлĕ шайра иртрĕ.