2012.12.17Хĕл Мучипе Кыш Бай

Патăрьел районĕнчи Сăкăт шкулĕнче чăваш ачисемпе пĕрле тутар ачисем те вĕренеççĕ. Сăкăтпа юнашар вырнаçнă Кзыл-Камыш ялĕнчи ачасене кашни кунах шкул автобусĕ кайса илет, леçсе ярать. Вĕренме кăна ан ÿркен. Тутар чĕлхисĕр пуçне вĕсем тата чăваш чĕлхине те шĕкĕлчеççĕ.

Çиччĕмĕш класра, акă, ачасем Тинюкова Н.К. вĕрентекенпе пĕрле Хĕл Мучипе Кыш Бабай çинчен калаçрĕç. "Кам вăл Хĕл Мучи? Кам вăл Кыш Бабай? Ăçтан тупăннă вĕсем, ăçта пурăнаççĕ, мĕн ĕçлеççĕ?.." Чăвашла та, тутарла та, вырăсла та пĕр сăнарах иккен вăл Хĕл Мучи — Кыш Бабай — Дед Мороз. Пур çĕре те çитет, пур ачана та пĕр пекех юратать, парнесем парса саламлать, шкул ачисене вĕренÿре малта пыма, çитĕнÿсем тума ăнăçу, çирĕп сывлăх сунать.

Урок хаваслă иртрĕ.