2012.02.03 Физкультура учительне Н.А.Кузнецова асăнса

Çамрăк ăрăва сывă пурнăç йĕркине хăнăхтарас, спортпа туслă пулма вĕрентес ĕçре физкультура учителĕсен тÿпи  пысăк. Çакна лайăх ăнланаççĕ Сăкăт шкулĕнче вĕрентекен Н.И.Тинюковпа В.В.Анюров учительсем, чылай çул хушши физкультурăпа ОБЖ урокĕсене ертсе пыраççĕ. Шкулта кăна мар, ялта иртекен спорт ăмăртăвĕсем те ытларах чухне вĕсем тăрăшнипе тивĕçлĕ шайра иртеççĕ.. Район тата республика шайĕнчи ăмăртусене те ачасем вĕсем çине тăнипех хутшăнаççĕ. Акă, оборонăпа спорт ĕçĕн уйăхлăхĕн планне те вĕсемпе пĕрле сÿтсе яврĕç Сăкăт шкулĕнче.

   Уйăхлăха хутшăнса шкулта чылай çул ĕçленĕ тата  пурнăçран вăхăтсăр уйрăлса кайнă физкультура  учительне Н.А.Кузнецова асăнса волейбол турнирĕ ирттерме палăртнă.

   8-11 классенче вĕренекен хĕрсемпе каччăсем спортзала пуçтарăнчĕç. Н.И.Тинюков ăмăртăва уçса Н.А.Кузнецовăн пурнăçĕпе ĕçĕ-хĕлĕ çинчен каласа пачĕ. Юратнă  учителе асăнса пурте пĕр самант шăп тăчĕç. Турнира 11 тата 8а классем пуçларĕç. Арçын ачасен командисем хушшинче 11 тата 10 классем вăйлăрах пулни палăрчĕ. Паян хĕр ачасен командисем ăмăртĕç. Çĕнтерÿçĕсене вара призсем кĕтеççĕ.