2012.01.19 Каникулăн хаваслă кунĕсем

Сисмесĕрех Çĕнĕ çул уявĕсем те персе çитрĕç. Хĕллехи каникул кунĕсене шкул  ачисем хавас кăмăлпа кĕтсе илчĕç. Хĕл мучипе Юр пикен парнисемпе саламĕсем хыççăн кăмăл ырă паллах. Çанна тавăрса вĕреннĕ ачасен выляс та кулас, савăнас килет, уçă сывлăшра пулас килет. Кам килте ашшĕ-амăшне пулăшать е телевизор пăхса киленет, кам йĕлтĕрне сырать те юлташĕсем патне вĕçтерет, теприсем ушкăнпа шкулалла  васкаççĕ…

Ял çамрăкĕсем тăрăшнипе шывпа сапса каток турĕç Сăкăтра. Халь вара иртен пуçласа каçченех «хурçă  утсен» сасси  чăр та чар. Ял варринчи каток çинчен ача-пăча татăлмасть. Хоккейла та выляççĕ, тинрех коньки çине тăнисем ярăнма вĕренесшĕн тапаçланаççĕ…Ачисемпе пĕрле хăш-пĕр ашшĕ-амăшĕ те коньки  йăтса çутă  пăр çине çитсе канма-савăнма васкать. Раштав уявĕн кунĕсем çемьепе пĕрле канма питех те меллĕ-çке.

 5-мĕш класра вĕренекенсем каникулăн малтанхи кунĕсенчех шкула васкарĕç. Класс ертÿçи Тинюкова А.П. ачасемпе спортзалта тĕл пулчĕ. Мĕн тĕрлĕ вăйă вылямарĕç пуль пиллĕкмĕшсем!  «Хаваслă старт» ăмăрту туслăх çĕнтернипе вĕçленчĕ.

Вырăс чĕлхипе литературине юратакансем каникул кунĕсенче те çывăх вăхăтра иртекен наукăпа творчество конференцине хатĕрленчĕç. Акă, 8 класри Таймукова Карина вырăс литературин секцине хутшăнма кăмăл тăвать. Çавна май вырăс чĕлхипе литературине вĕрентекен Т.Ф Ёлкинапа пĕрле суйласа илнĕ темăна  тепĕр хут пăхса тухса резентации хатĕрлерĕç, хаçат кăларчĕç – наука ĕçне анлăлатрĕç, пĕтĕмлетрĕç.

Вуннăмĕшсен чи юратнă вăййи – волейбол. Пушă вăхăт тупăнсанах хĕрсемпе каччăсем икĕ ушкăна уйрăлаççĕ те , çăмăл тупă сетка урлă каллĕ те маллĕ вĕçме тытăнать.Акă халĕ те вĕсем волейболах суйласа илчĕç. Сывлăх кунĕ ачасемшĕн усăллă пулчĕ тесе шутлать класс ертÿçи Н.И.Тинюков, Çĕнĕ çул уявĕнче тутлă та пылак çимĕçсемпе сăйланнă хыççăн спортпа туслăрах пулни питех те кирлĕ.

Çĕнĕ çул  - парнеллĕ уявсенчен пĕри, мĕншĕн тесен Хĕл мучипе Юр пике пушă алăпа çÿремеççĕ, вĕсен кутамкки яланах туп-тулли. Сăкăт шкулне те вĕсем парнесемпе савăнтарчĕç: ирёклĕ майпа кĕрешекенсен секцине çÿрекен ачасем валли формăсем тата çамрăк хоккеистсем валли клюшкăсем илсе килчĕç. Сăкăт ачисемшĕн ырă ĕç тавакансем – ку шкултан вĕренсе тухнă выпускниксемех: Чернов Алексей Валерьевич, Чиркин Александр Анатольевич, Гусаров Юрий Александрович, Чиркин Евгений Владимирович, Ларионов Валерий Николаевич, Шакмаев Алексей Анатольевич, Мишин Михаил Георгиевич, Анюров Александр Петрович. Тăван шкул вĕсене чĕререн тав тăвать, Çĕнĕ çул ячĕпе саламлать.

Сăкăт шкулĕнче Раштав ячĕпе волейболистсен турнирĕ иртрĕ. Спорт ăмăртăвне Сăкăт ял тăрăхĕн пуçлăхĕ С.И.Толстов тата Сăкăт шкулĕн директорĕ А.В.Падусев уçрĕç. Волейболистсен виçĕ ушкăнĕ те аван вылярĕ. Çĕнтерÿçĕсем Шупашкарта пурăнакан Сăкăт çамрăкĕсем пулчĕç. Иккĕмĕшсем  - Сăкăтри çамрăксем, виççĕмĕшсем вара – Патăрьелĕнче пурăнакан Сăкăт çыннисем. Красное Знамя» хуçалăх ертÿçи П.Н.Никифоров , Шăмăршă вăрман хуçалăхĕн ертÿçи В.И.Глухов тата А.П.Муллин предприниматель спонсорсем пулăшнипе уяв тивĕçлĕ шайра иртрĕ.