2018.09.15 Тури Чакă ялĕнче пурăнакан Петр Николаевич Попов 90 çул тултарчĕ

Патăрьел районĕнчи Тури Чакă ялĕнче пурăнакан тыл ĕçченĕ, ĕç ветеранĕ Петр Николаевич Попов тăхăрвунă çул тултарчĕ. Сумлă юбилей ячĕпе Аслă Чемен ял администраци пуçлăхĕ Гаврил Медведев Раççей Президенчĕн тата Патăрьел район администрацийĕн салам çырăвĕсене тата парнисене парса хисеп турĕ, нумай çул хушши пурăнма сывлăх сунчĕ.

Петр Николаевич Тури Чакă ялĕнче йышлă çемьере çуралнă. Вăрçă вăхатĕнче çамрăк ачасем ял хуçалăхĕнчи пĕр ĕçрен те ютшăнса тăман. Петр Николаевич та ĕçпе пиçĕхсе ÿснĕ. Лашапа вăрман кăларнă çĕрте тăрăшнă, колхозра тĕрлĕ ĕçсем пурнăçланă. Яшлăх çулĕсем çитсен Петр Николаевич Тури Чакă хĕрĕпе Мария Николаевнăпа çемье çавăрнă. Ачисене тивĕçлĕ воспитани парса ура çине тăратнă.

Паянхи кун Петр Николаевич ывăлĕн çемьипе пурăнать. Тăхарвунă çулта пулсан та ларса тăрас темест, кил-çурт таврашĕнче тăрмашать. Хăна-вĕрле пуçтарăнсан кăмăлĕ тулать, ачисемпе мăнукĕсемпе савăнать.