Пĕр çемьерен виçĕ ăру суйлава хутшăннă

Кĕçĕн Арапуçĕнче пурăнакан Василий Петровичпа Зоя Карповна Маркидановсем çулĕпе çамрăк мар: кил хуçи 92 çулта, сакăр ача амăшĕ _ 86ра. Апла пулин те вĕсем паянхи суйлава пысăк хавхаланупа хутшăнчĕç. Сăмах май каласан, Маркидановсен çемйинчен виçĕ ăру суйлав участокĕсене кайса Раççей тата республика шайĕнчи тивĕçлĕ депутатсене суйланă.

_ Вуннăмĕш теçеткере пыратăп пулин те, хамăр пурнăçпа, ачасен, мăнуксен малашлăхĕпе çыхăннă суйлавсене яланах хутшăнатпăр, нихăçан та унтан айккинче юлман. Пирĕн ырă тĕслĕхе ачасем çеç мар, мăнуксем, вĕсен ачисем те курччăр,_ хавхаланса пĕлтерчĕ пирĕн хаçат корреспондентне вăрçă вучĕ витĕр тухса ĕмĕр тăрăшшĕпе ĕçпе пиçĕхнĕ ветеран.